طاب من مصطفى فتوح (المتهم الثانى) لوالديه فى قضية المحامين بطنطا

خ


مصطفى فتوح: المتهم الثانى



بسم الله الرحمن الرحيم

أهلى الأعزاء على قلبى.
أحب أطمنكم على وضعى كافة أفراد الشرطة بتعاملنا معاملة الكرام والكل بيكن لينا الاحترام حتى مع المساجين وأحب أقولكم ده أمر واقع وأتفرض عليا وقدر ربنا وقدره ولازم أتقبله لأنه من عند ربنا وكل اللى ربنا يجيبه زى الفل الله أعلم لو كنا بره كانت ممكن حاجه أسوء من كده تحصل ( عسى أن تكرهوا شيئا وهو خير لكم ) وأنا عايزك يابابا أنت وماما تجمدو وسيبوها على الله وأهم حاجه أنتى ياماما أنا عارف أن انتى منهارة جدا جدا لكن أحب أقولك ابنك صلب ومتقبل قدر ربنا , وسلمولى على محمد ومروه ومنى وعلى طارق وساره وأدهم والبت رودى السكره وسلمولى على ياسر وأسماء وأحمد والعيله كلها. وإن شاء الله أحب اطمنكم الحكم ده فى القانون اسمه حكم ارهاب بمعنى بيهدو القضاة ووكلاء النيابة وان شاء الله فى الاستئناف هناخد براءة أو حكم خفيف جدا جدا ان شاء الله , . . . . .
.................................................
يشوفوا الدنيا هتمشى ازاى وخلوهم يجبولكوا تصريح زيارة ليا وابقوا ظبطونى وانتو جاين اكل وشرب وهاتو فلوس علشان تتحط فى الأمانات بس ان شاء الله مش هنحتاج لكل ده ويابابا اجمد وخليك قوى علشان أنا قوى زيك وعمرى ما هضعف والموقف ده عمره ما هيكسرنى ده هيخلينى أقوى ان شاء الله وشدو حيلكو بالمناسبة احنا موجودين بسجن دمهور العمومى ومفيش حد هنا من المساجين والظباط ميعرفوناش مصر كلها عرفت مصطفى فتوح والناس هنا كلها بتحترمنا متقلقوش عليا عارفين انا ايه اللى مصبرنى ان أنا مظلوم فعلا ومعملتش أى حاجة من التهم اللى متوجهه ليا فبقول ده قضاء وقدر وابتلاء من عند ربنا وسبحان الله فعلا أنا دلوقتى حاسس ان ربنا معايا حاسس بهمزة وصل بينى وبين ربنا ودى حاه مش مصبرانى دى مخليانى والله فعلا صلب جدا وأنا عايزكم تكلمو (......) قولولها متقلقش وان شاء الله هخرج بسرعة وبعد الشر لو الموضوع طول قولولها تشوف حياتها بقى ربنا يرزقها بواحد غيرى ويكون أحسن منى , أهم حاجة عندى بابا وماما أوعو تتعبوا لو تعبتم أو حصلتلكم حاجة أنا مش هقدر أعيش دقيقة واحدة بعدكم انتوا النور اللى منور حياتى أوعو يحصلكو حاجة اجمدو ولو بتحبونى ,
ويلا بقى كفاية كدة علشان مطولش عليكم ,

ابنكم
مصطفى أحمد فتوح
نقلا عن منتدى محامين مصر الاستاذ /ياسر نبيل المحامى